Victoria contra o Cultural Areas para seguir na loita pola categoría
O Negreira volveu gañar: 1-0. Iván González anotou no minuto 89 un gol para a esperanza roxilla.Lonxe de tirar a toalla, o Negreira, fiel ao seu espírito de superación, pelexará pola permanencia tras gañar a súa segunda final ante un rival directo como o Areas, nun vibrante duelo que se decidiu no último suspiro co gol de cabeza de Iván González, que fixo xustiza ao visto sobre o verde do García Calvo, onde os locais levaron sempre o peso do partido ante un Areas que tentou explotar a velocidade por bandas, pero que se topou cun Negreira moi seguro. O Areas tentouno case sempre con disparos afastados, mentres que Iván puido marcar para os locais ao fío do descanso nun envío de Juan que se foi alto. Nun duelo de ida e volta, foi Iván o que resolveu. O de Noia cabeceou no segundo pau un centro medido de Capelo, que puxo a guinda a un partido moi disputado.
